घरफोड्यांचे सत्र सुरूच ; अवैध दारू विक्रीचे केंद्र बनल्याने गुन्हेगारीत वाढ !

आडगाव पोलीस ठाण्याच्या हद्दीत अनेक हॉटेलांमध्ये सर्रास दिवसरात्र बेकायदेशीरपणे दारू विकली जात आहे. तसेच, दारू पिण्यासाठी मद्यपीना जागा देखील उपलब्ध करून दिली जात असल्याने या संपूर्ण परिसरात संध्याकाळनंतर मद्यपींसह सराईत गुन्हेगारांचा त्रास सर्वसामान्य नागरिकांना सहन करावा लागत आहे. तर, याच आडगाव पोलीस ठाण्याच्या हद्दीत अनेक अंमली पदार्थ विकले जात आहे. तसेच, घरगुती गॅसचा काळाबाजार देखील मोठ्या प्रमाणात केला जात आहे. यातून पोलीस मोठ्या प्रमाणात आर्थिक हितसंबंध जोपासत असल्याची चर्चा सुरु झाली आहे. 

आडगाव शिवारात दिवसरात्र दारू पिण्यासाठी अनेक सराईत गुन्हेगार येत असल्याने ते दारूच्या नशेत परिसरात घरफोड्या करीत असल्याचा अंदाज स्थानिक रहिवाशांनी वर्तविला आहे. तसेच, हे गुन्हेगार दारूच्या नशेत असल्याने त्यांना हटण्यास गेल्यास ते अंगावर येत असल्याने त्यांना कोणीही बोलण्यास धजावत नसल्याचे बोलले जात आहे. तर अनेक परिसरात आडगाव पोलिसांची कुठलीही गस्त होत नसल्याचा आरोप रहिवाशांकडून करण्यात येत आहे.