शहरात सोनसाखळी चोरांचा उच्छाद ; पोलीस यंत्रणा ढिम्म !

पाच लाखांच्या सोनसाखळी एकाच दिवशी लंपास !

शहरातील महिला असुरक्षित ! अंगण झाडणे झाले मुश्किल !

नाशिक : नाशिक शहरात महिला असुरक्षित झाल्या असून एकाच दिवशी शहरातील विविध भागातून महिलांच्या अंगावरील ४ लाख ९६ हजार रुपयांचे सौभाग्याचे लेणे चोरटयांनी ओरबाडून नेले आहे. सोनसाखळी चोरांनी आपला उच्छाद मांडला असताना दुसरीकडे पोलीस यंत्रणा ढिम्म पडल्याचे दिसत आहे. सकाळी सात वाजेपासून रात्रीपर्यंत हि लूटमार सुरु असतांना पोलिसांच्या हाती एकही चोरटा लागला नसल्याने पोलीस नेमके काम करतात तरी कोणते असा प्रश्न सामान्य महिला वर्गाकडून उपस्थित केला जात आहे. याबाबत शहरातील विविध पोलीस ठाण्यात अज्ञात दुचाकी चालकांविरोधात जबरी लुटीचे गुन्हे दाखल करण्यात आले आहे. यासाठी सुस्त झालेल्या पोलीस अधिकाऱ्यांना आणि कर्मचाऱ्यांना वठणीवर आणण्यासाठी पोलीस आयुक्त संदीप कर्णिक यांनी पोलीस आयुक्तालयात भाकर फिरवून पोलीस ठाण्यांना नव्या दमाचे दमदार अधिकारी देण्याची गरज असल्याची चर्चा जोर धरू लागली आहे. 

सध्या शहरात महिलांची सुरक्षितता धोक्यात आली आहे. अंगणात झाडू मारताना सोनसाखळी चोरी, पार्किंगमध्ये बोलत असताना सोनसाखळी चोरी, दुचाकीवरून जात असताना सोनसाखळी चोरी, पायी जात असताना सोनसाखळी चोरी, देवदर्शन करताना सोनसाखळी चोरी, लग्न समारंभात गेल्यास सोनसाखळी चोरी, घराला कुलूप लावून बाहेर गेल्यास घरफोडी, भाजी आणण्यास गेल्यास सोनसाखळी चोरी, बसमध्ये जाताना गळ्यातील आणि बॅगेतील दागिन्यांची चोरी होत असल्याने संपूर्ण शहरात महिला कुठेही सुरक्षित नसल्याचे दिसत आहे. त्यामुळे पोलीस आयुक्त संदीप कर्णिक यांनी शहरातील पोलीस ठाण्यातील अधिकाऱ्यांची खांदेपालट करून पोलीस ठाण्यांना नवे कारभारी दिल्यास जोमाने गुन्ह्यांची उकल होण्याची आशा व्यक्त केली जात आहे.