शहरात खासगी सावकारांविरोधात सर्वात मोठी कारवाई !
लाखोंची रोकड, करारनामे, कोरे चेक, खरेदी खत, पैसे मोजण्याचे मशीन, अमेरिकन डॉलर, कोरे स्टॅम्प जप्त !पोलीस आयुक्त संदीप कर्णिक यांचे नाशिककरांकडून कौतुक !
नाशिक : नाशिक शहरातील विविध पोलीस ठाण्याच्या हद्दीतील तेरा खासगी सावकारांच्या घरी नाशिक पोलिसांनी सह उपनिबंधक कार्यालयातील अधिकाऱ्यांसह छापासत्र राबवले. यामध्ये आठ सावकारांकडून जवळपास चाळीस लाख रुपये, करारनामे, कोरे चेक, खरेदी खत, पैसे मोजण्याचे मशीन, अमेरिकन डॉलर, कोरे स्टॅम्प असा मुद्देमाल पोलिसांनी हस्तगत केला आहे. या खासगी सावकारांविरोधात गुन्हे दाखल करण्यात आले आहे. या कारवाईमुळे शहरातील खासगी सावकारांचे चांगलेच धाबे दणाणले आहे. खासगी सावकारांच्या जाचाला न जुमानता थेट पोलिसांशी संपर्क करण्याचे आवाहन पोलीस आयुक्त संदीप कर्णिक यांनी केले आहे.
गेल्या काही दिवसांपासून नाशिक शहरातील खासगी सावकारी चांगलीच चर्चेत आली होती. या खासगी सावकारांच्या जाचाला कंटाळून काही नागरिकांनी आपली जीवनयात्रा संपवली होती. मुद्दल पेक्षा व्याज जास्त झाल्याने कर्ज फेडायचे कसे यासाठी अनेकांना आपले घरदार, वाहने, जमीन, शेती सावकारांच्या घशात घालावी लागली होती. इतके करून देखील सावकारांची मागणी कमी होत नसल्याचे काही दाखल गुन्ह्यांवरून सिद्ध झाले होते. त्यामुळे पोलीस आयुक्त संदीप कर्णिक यांनी खासगी सावकारीविरोधात कडक पाऊले उचलण्यास सुरुवात केली. खासगी सावकारी करणाऱ्या वैभव देवरे याच्या पत्नीसह टोळीला थेट मोक्का लावत एक धडाकेबाज कारवाई करून दाखवण्याचे साहस दाखवले होते. त्यामुळे नागरिकांनी पोलिसांविषयी झालेल्या आपल्या मतात बदल करून खासगी सावकारांविरोधात तक्रार करण्यास सुरुवात केली. त्यानंतर पोलिसांनी कैलास कुंडलवाल, रोहित कुंडलवाल, निखिल कुंडलवाल या पितापुत्रांविरोधात खासगी सावकारी प्रकरणात गुन्हे दाखल करीत रोहित कुंडलवाल याच्या मुसक्या आवळत त्याला कारागृहाची हवा खायला पाठवले.
त्यानंतर पोलीस आयुक्त कर्णिक यांनी खासगी सावकारांभोवती आपला फास अजूनच आवळण्यास सुरुवात केली. शनिवार दि. ५ रोजी सकाळपासून शहरातील विविध पोलीस ठाण्याच्या हद्दीतील खासगी सावकारांच्या घरी जिल्हा उपनिबंधक कार्याकायातील अधिकाऱ्यांसोबत छापासत्र सुरु केले. यामध्ये नय्या खैरे याच्या घरी छापा टाकून १२ करारनामे, १९ चेक, २१ लाख पन्नास हजार रुपये रोख, संजय शिंदे याच्या घरातून ८१ कोरे चेक, ४० खरेदी खत, ६ लेजर बुक, चार डायऱ्या, ३ लाख २० हजार ५०० रुपये रोख रक्कम, पैसे मोजण्याचे मशीन, प्रकाश अहिरे याच्या घरातून २३ रजिष्टर कागदपत्र, ४ लाख ५० हजार रुपये रोख, साडेसात लाख रुपयांचे ८८ अमेरिकन डॉलर, सुनील पिंपळे याच्या दोन घरांची आणि तीन दुकानांची झडती घेत ११ खरेदीखत, दोन साठेखत, एक कब्जा पावती, पाच कोरे स्टँप, २४ कोरे चेक, दोन हात उसनवार पावत्या, ४ लाख ८ हजार रुपये रोख, गोकुळ धाडा याच्या घरातून ५० उसनवार पावत्या, दोन खरेदी खत,७० कोरे चेक, धनु लोखंडे याच्या घरातून ५० खरेदीखत, १२ कोरे चेक, राजेंद्र जाधव याच्या घरातून दोन डायऱ्या २ लाख ३ हजार ३५० रुपये रोख तर कैलास मैंद याच्या घरातून दोन कोरे चेक, एक एमओयू, ९ खरेदीखत असा मुद्देमाल पोलीस अधिकाऱ्यांसह उपनिबंधक अधिकाऱ्यांनी ताब्यात घेतला आहे. या सर्वांविरोधात महाराष्ट्र सावकारी अधिनियम सन २०१४ अन्वये गुन्हे दाखल करण्यात आले आहे. तर गुरुदेव कांदे, जुबेर पठाण, कैलास मुदलियार, सचिन मोरे आणि रोहित चांडोळे यांच्या घराच्या झडतीमध्ये अवैध सावकारी व्यवसायाबाबत काहीही आढळून आले नसल्याची माहिती पोलीस अधिकाऱ्यांनी दिली आहे.
हि कारवाई वरिष्ठ पोलीस निरीक्षक तृप्ती सोनावणे, विलास श्रीमनवार, अशोक गिरी, जगवेंद्र राजपूत, आंचल मुदगल, सुनील पवार, सचिन खैरनार, जितेंद्र सपकाळे, रणजित नलवडे यांनी आपल्या सहकारी अधिकारी आणि कर्मचाऱ्यांसह केली आहे.
यापूर्वी नाशिकमध्ये अनेकांनी आत्महत्या करीत संपूर्ण कुटुंब संपवले आहे. तर अनेकांनी आत्महत्या करण्याचा प्रयत्न केला आहे. याबाबत अनेकदा पोलीस ठाण्यांच्या पायऱ्या झिजवून देखील काही उपयोग होत नव्हता. उलट पोलिसांकडूनच खाजगी सावकारांना तक्रारदाराबद्दल माहिती पुरवली जात होती. त्यामुळे या खासगी सावकारांविरोधात पोलिसांकडे जाण्याचे धाडस कोणीही करीत नव्हते. मात्र, सध्या असलेले पोलीस आयुक्त संदीप कर्णिक यांनी नागरिकांमध्ये आत्मविश्वास निर्माण केल्याने खासगी सावकाराला कंटाळलेले नागरिक पुढे येऊ लागले आणि कारवाई होण्यास सुरुवात झाली आहे.
