पोलीस प्रशासनाविरोधात नागरिक रस्त्यावर !
जिल्हाधिकारी कार्यालयावर भव्य मूक मोर्चा !दुहेरी हत्याकांडात दोषी पोलीस अधिकाऱ्यांना सहआरोपी करावे !खटला जलदगती न्यायालयात चालविण्याची मागणी !
नाशिक : उपनगर पोलीस ठाण्याच्या हद्दीत गेल्या महिन्यात रंगपंचमीच्या दिवशी दोघा सख्या भावांची घरासमोरच निर्घृण हत्या करण्यात आली होती. या हत्याकांडातील पाच संशयितांना गुन्हे शाखा एकच्या पथकाने अवघ्या पाच तासात अटक केली होती. मात्र, या हत्याकांडामध्ये पोलिसांचा तपास संशयितांना वाचविण्याच्या दृष्टीने चालू असून, पोलिसांनी माहिती देणाऱ्यांची नावे गुप्त न ठेवल्यानेच हे हत्याकांड झाले असल्याचा आरोप करीत आंबेडकरी अनुयायांनी पोलीस प्रशासनच्या विरोधात सोमवारी भव्य मोर्चा जिल्हाधिकारी कार्यालयावर काढला होता. यामध्ये पोलिसांचे अवैध धंदे चालविणाऱ्या मारेकऱ्यांबरोबर हितसंबंध असल्याचा आरोप करीत त्यांना सेवेतून बडतर्फ करण्याची मागणी देखील करण्यात आली. पोलीस प्रशासनाच्या विरोधात मूक मोर्चाचे निघाल्याने नाशिकमध्ये पोलीस प्रशासनाच्या नाकर्तेपणा विषयी चर्चा रंगू लागल्या आहे.
याबाबत अधिक माहिती अशी की, बुधवार दि. १९ मार्च रोजी रंगपंचमीच्या रात्री साडेनऊ वाजेच्या सुमारास उपनगर पोलीस ठाण्याच्या हद्दीतील बोधलेनगर येथील आंबेडकर वाडी परिसरातील सार्वजनिक शौचालयाजवळ उमेश भगवान जाधव, ३२ आणि प्रशांत भगवान जाधव ३० या दोघा भावांची संशयित आरोपी सागर मधुकर गरड, ३२, रा. आंबेडकर वाडी उपनगर नाशिक, अनिल विष्णु रेडेकर, ४०, रा. उत्तरानगर पोतदार शाळेजवळ, तपोवनरोड नाशिक, सचिन विष्णु रेडेकर, ४४, रा. गायत्री नगर, पुनारोड नाशिक, अविनाश उर्फ सोनु नानाजी उशिरे, २६, रा. सर्वेश्वर चौक, नविन सिडको उत्तमनगर, नाशिक, योगेश चंद्रकांत रोकडे, ३०, रा. आंबेडकर वाडी, उपनगर नाशिक यांनी पूर्व वैमन्यासातून आणि परिसरात आपले वर्चस्व रहावे म्हणून धारदार शस्त्रांचा आणि लोखंडी रॉडचा वापर करून निर्घृण हत्या केली होती. शहरात सुरु असलेल्या खुनांच्या घटनांमुळे पुन्हा एकदा पोलीस प्रशासनाच्या कार्यक्षमतेवर नाशिककरांनी प्रश्नचिन्ह उपस्थित केले होते.
पोलिसांचा तपास योग्य दिशेने होत नसल्याने आंबेडकरी जनतेने सोमवार दि. ७ रोजी सकाळी बी. डी. भालेकर मैदान येथून जिल्हाधिकारी कार्यालयावर मोर्चा काढला होता. यावेळी पोलीस प्रशासन संशयित आरोपीना सहकार्य करीत असल्याचा आरोप करण्यात आला. तसेच, पोलिसांनी ज्या पद्धतीने संशयितांना तात्काळ अटक केली ती देखील संशयास्पद असल्याचे सांगण्यात आले. पोलिसांना संशयित आरोपींच्या अवैध धंद्यांची माहिती दिली असता माहिती देणाऱ्यांची नावे गुप्त न ठेवल्याने हे हत्याकांड झाल्याचा आरोप करीत पोलिसांचे हप्ते चालू असल्याने संशयितांना मदत केली जात असल्याचा आरोप देखील मोर्चात सहभागी झालेल्या नागरिकांनी केले. संशयितांना पकडल्यानंतर त्यांच्याकडून फक्त लोखंडी रॉड आणि एक कोयता जप्त करण्यात आला आहे. मात्र, जप्त केलेला कोयता हत्या करताना वापरला गेला नसल्याचा आरोप देखील करण्यात आला. संशयितांनी हत्याकांड करून कपडे बदलले होते. मात्र, पोलीस त्या दिशेने पोलीस तपास करायला तयार नव्हते. मात्र, मित्रपरिवाराने दबाव टाकल्यानंतर पोलिसांनी रक्ताने माखलेले कपडे जप्त केले होते. त्यामुळे पोलिसांचा तपास दिशाहीन करणारा आणि संशयितांच्या पथ्यावर पडणार असल्याचा संतापजनक आरोप करण्यात आला आहे. या मोर्च्यामध्ये शेकडो महिला आणि पुरुष सहभागी झाले होते. तर महिलांची संख्या लक्षणीय असल्याचे दिसत होते.
गोमांस विक्री करणाऱ्यांशी सतत संपर्क ठेवल्याने आणि अंमली पदार्थ विक्री करणाऱ्या संशयितांसोबत सहभाग निष्पन्न झाल्याने पोलीस आयुक्त संदीप कर्णिक यांनी पोलीस हवालदार युवराज पाटील याला निलंबित केले आहे. तसेच, अंमली पदार्थ विक्री करणाऱ्या संशयितांबरोबर सहभाग निष्पन्न झाल्याने पाटील याला सहआरोपी करण्यात आल्याने पोलीस दलात एकच खळबळ आहे. मात्र, पोलीस कर्मचारीच गुन्हेगारांसोबत हातमिळवणी करत असल्याने नाशिक पोलीस प्रशासनाची इमेज चांगलीच डागाळली आहे.
मोर्चेकऱ्यांच्या मागण्या – फिर्यादीमध्ये हस्तक्षेप करणाऱ्या पोलीस उपायुक्त मोनिका राऊत यांना निलंबित करा, पोलीस अधिकारी आणि कर्मचारी यांना सहआरोपी करणे हि महत्वाची मागणीचे फलक घेऊन मोर्चा काढण्यात आला. पोलीस उपनिरीक्षक गवळी यांना सहआरोपी करून सेवेतून बडतर्फ करा, गुन्हे शाखा एक मधील पोलीस कर्मचारी विशाल काठे, परदेशी याला सहआरोपी करा, अवैध धंदे चालक बाळू पाटील याला सहआरोपी करा, जलद गती न्यायालयात खटला चालवावा, संशयितांवर मोक्कान्वये कारवाई करावी, मुख्य सूत्रधाराला अटक करावी, दोन फुटाच्या एका कोयत्याने दोघा भावांवर पन्नास वर्मी घाव होऊ शकता का? अशा आशयाचे आणि मागण्यांचे फलक हातात घेऊन मूकमोर्चा काढण्यात आला होता.
संशयित आरोपींना फाशी झालीच पाहिजे. कारण संशयित बाहेर आल्यास आम्हालाही मारून टाकतील. संशयितांना साथ देणाऱ्या पोलिसांना देखील फाशी व्हायला हवी. पोलीस अधिकाऱ्यांना सहआरोपी करून निलंबित करावे. पैशासाठी माझ्या मुलांना मारून टाकले आहे. लोकांना मारण्यासाठी पोलीस पैसे घेतात का ?: अंजना जाधव, मयत जाधव बंधूंची आई
