चुकीला माफी नाही ; पोलीस दल शिस्तप्रिय होते आणि राहणार !

शिक्षक मारहाण प्रकरणाची होणार नव्याने चौकशी – यापूर्वी नाशिकरोड पोलीस ठाण्यातील वृंदावन गीते आणि रवींद्र साबळे यांनी सिन्नर फाटा येथे ३० जून रोजी रात्री नऊ वाजेच्या सुमारास पानटपरीवर आलेले शिक्षक रमेश कवडे आणि त्यांचे शालक जालिंदर उगले यांना बेदम मारहाण करीत थेट ड्रंक अँड ड्राइव्हचा गुन्हा दाखल केला होता. मात्र, कवडे यांना दुचाकी चालविता येत नसून ते मद्यपान देखील करीत नव्हते. तरी देखील चुकीच्या पद्धतीने कारवाई केली होती. याबाबत कवडे यांनी पोलीस उपायुक्त मोनिका राऊत यांच्याकडे तक्रार अर्ज केला होता. मात्र, या तक्रारीची दखल घेत यामध्ये हे दोघे कर्मचारी दोषी आढळून आले होते. तरी त्यांना फक्त नागरिकांसोबत गैरवर्तन केले म्हणून लेखी ताकीद देऊन सोडण्यात आल्याने तक्रारदाराच्या तोंडाला एकप्रकारे पाने पुसल्याची चर्चा सुरु झाली होती. या प्रकरणाची देखील पुन्हा चौकशी करण्यात येणार असल्याची माहिती पोलीस आयुक्त संदीप कर्णिक यांनी दिली आहे. त्यामुळे आता या कर्मचाऱ्यांवर काय कारवाई होणार याकडे सर्वांचे लक्ष लागले आहे.