पुन्हा झालेल्या गोळीबाराच्या घटनेने एकच खळबळ !
परिसरात वाढत्या गुन्हेगारीमुळे नागरिकांमध्ये दहशत !
नाशिक : पंचवटी परिसरातील वाढती गुन्हेगारी थांबण्याऐवजी वाढत असल्याचे दिसत आहे. पोलीस अधिकाऱ्यांवर प्राणघातक हल्ले, खून, प्राणघातक हल्ले, जबरी लूट, भाविकांची दिवसाढवळ्या लुटीचे प्रकार सुरु असताना टोळीयुध्दाने डोके वर काढले. तसेच, टोळीयुद्धातून थेट एकमेकांवर गोळीबाराच्या घटना ताज्या असतानाच पुन्हा एकदा म्हसरूळ परिसरातील एका व्यावसायिकाच्या घरावर दोघा अज्ञात हल्लेखोरांनी गोळीबार करीत आपली दहशत माजविण्याचा प्रयत्न केला आहे. म्हसरूळ पोलिसांनी घटनास्थळी धाव घेत गोळीबारात पडलेली पुंगळी जप्त केली असून, संशयितांचा शोध सुरु केला आहे.
पंचवटी परिसर गुन्हेगारांचा अड्डा असल्याचे सर्वश्रुत आहे. त्यांना पंचवटी परिसरातील अनेक राजकीय व्यक्तींचा वरदहस्त लाभलेला आहे. त्यामुळे हे गुन्हेगार उजळ माथ्याने गुन्हे करून राजकीय व्यक्तीच्या वरदहस्ताने पोलिसांच्या स्वाधीन होत असल्याचे दुर्दैवी चित्र सध्या दिसत आहे. पोलीस, गुन्हेगार आणि राजकीय नेते यांच्या अभद्र युतीमुळे सर्वसामान्य नागरिक वाढत्या गुन्हेगारीमुळे होरपळून निघत आहे. सध्या घरफोड्यांमुळे नागरिकांच्या आयुष्यभराच्या कमाईवर चोरटे डल्ला मारत आहे. तर दुसरीकडे थेट नाशिकच्या माजी महापौरांच्या जावयाची आलिशान गाडी त्यांच्या घरासमोरून लंपास केली जात आहे. तर काही गोळीबाराच्या घटना पोलिसांच्या मदतीने दाबल्या जात असल्याच्या चर्चांनी नाशिकच्या पोलिसिंगचे एकप्रकारे वाभाडे निघत आहे. नुकत्याच पंचवटी परिसरात टोळीयुद्धातून नाग चौक आणि हिरावाडी परिसरात गोळीबार झाल्याच्या घटनेने नागरिक दहशतीखाली असताना म्हसरूळ परिसरात एका व्यावसायिकाच्या घरावर गोळीबाराची घटना घडल्याने एकच खळबळ उडाली आहे.
याबाबत म्हसरूळ पोलिसांनी दिलेली माहिती अशी की, म्हसरूळ परिसरात कलानगर मध्ये राहणारे साई अंगद उमरवाल, ६९, रा. कलानगर, लेन न. ५, म्हसरूळ, दिंडोरीरोड, पंचवटी हे आपले मुले संतोष आणि मनीष उर्फ मोतीलाल साई उमरवाल, सुना आणि नातवंडे यांच्यासोबत एकत्र राहतात. दरम्यान रविवार दि. ५ रोजी पहाटे अज्ञात दोघा संशयितांनी येऊन घरासमोर पार्क केलेली एम. एच. १५ जी. आर. २९०० हिच्या काचा फोडून नुकसान केले होते. या तोडफोडीबाबत म्हसरूळ पोलीस ठाण्यात अज्ञात संशयितांविरोधात अदखलपात्र गुन्ह्याची नोंद करण्यात आली होती. त्यानंतर पुन्हा शुक्रवार दि. ७ रोजी पहाटे ४ वाजून ३७ मिनिटांनी अज्ञात दोघा संशयितांनी येत साई उमरवाल यांच्या घराच्या दिशेने गोळीबार करीत दुचाकीवरून फरार झाले. गोळीबार करीत असल्याची घटना परिसरात लावण्यात आलेल्या सीसीटीव्ही मध्ये कैद झाले आहे.
गोळीबाराच्या घटनेची माहिती मिळताच वरिष्ठ पोलीस निरीक्षक अतुल डहाके यांच्यासह गुन्हे शोध पथकाने घटनास्थळी धाव घेत परिसराची आणि सीसीटीव्ही फुटेजची तपासणी केली. दरम्यान घटनास्थळी पोलिसांना रिकामी पुंगळी मिळून आली आहे. तसेच, सीसीटीव्ही फुटेजच्या आधारे पोलीस संशयितांचा शोध घेत आहे. पंचवटी परिसरातील वाढत्या गुन्हेगारीकडे पोलीस आयुक्त संदीप कर्णिक जातीने लक्ष घालणार का असा प्रश्न नागरिकांकडून उपस्थित केला जात आहे.
फिर्यादी साई उमरवाल यांचा मुलगा मनीष उर्फ मोतीलाल साई उमरवाल हा जमीन खरेदी विक्रीचा व्यवसाय करतो. त्यामुळे एखाद्या व्यवहारातून त्यांचे कोणाशी काही बिनसले असावे असा प्राथमिक अंदाज पोलिसांनी वर्तविला आहे. तसेच, मनीष याला सामाजिक कार्याची आवड असल्याने त्यातून त्याच्या घरावर गोळीबार करण्यात आला का या दिशेने देखील पोलीस शोध घेत आहे.
