मागे वळून पाहताना : दंगलीची महिनापूर्ती !

खरंच पोलिसांच्या दाव्यानुसार दंगल नेतृत्वहीन होती का ?

वादग्रस्त वक्तव्य करण्यात आल्याने महाराष्ट्रात काही ठिकाणी याविरोधात जुलूस काढण्यात येत होते. तर काही ठिकाणी या वक्तव्याला पाठिंबा देण्यात येत होता. त्यामुळे महाराष्ट्राचे वातावरण ढवळून निघाले होते. असे असताना पोलीस अधिकारी म्हणतात की, दंगल ही पूर्वनियोजित नव्हती. मग दगडफेक झाली कशी, एका गल्ली बोळातील चौकात अचानक इतक्या मोठ्या प्रमाणात दगड आली कुठून, रॅलीला परवानगी नव्हती तर संवेदनशील परिसरात रॅलीला जाण्यापासून पोलिसांनी रोखले का नाही, दुचाकी रॅली संवेदनशील परिसरात जात असल्याचे दिसताच योग्य खबरदारी घेण्यात का आली नाही, जे चौक दंगल झाल्यानंतर प्रवेशास बंद करण्यात आले ते रॅलीला अटकाव करण्यासाठी केले का नाही, दंगलीच्या काही वेळ अगोदर आलेल्या स्वयंघोषित नेत्यांवर गुन्हे दाखल करण्यास टाळाटाळ का करण्यात आली असे प्रश्न या निमित्ताने उपस्थित केले जात आहे. 

भद्रकाली परिसरात वातावरण बिघडल्याचे मॅसेज शहरात पसरले आणि शहरातील विविध भागातून तरुणाचे जत्थेच्या जत्थे जुन्या नाशिकच्या दिशेने आले. मात्र, हे जमावाकडून फक्त घोषणाबाजी करण्यात येत होती. कुठलाही अतिरेक केला जात नव्हता. मात्र, याठिकाणी काही वेळात स्वयंघोषित नेते दाखल झाले आणि त्यांनी दंगलखोरांना चिथावणी देत म्हसरूळ टेक कडे जाण्याचे आदेश देत दंगलीस पूरक वातावरण निर्माण केले. त्यानंतर हा संतप्त दंगलखोरांना घेऊन हे नेतेमंडळी पुन्हा शालिमारच्या दिशेने गेले आणि त्या परिसरात पुन्हा दगडफेक करण्यात आली. तरी देखील पोलीस म्हणतात आम्हाला नेतृत्व असे काही दिसून आले नाही. याला नेमके काय म्हणावे. 

सोमवार दि. १६ रोजी ईद-ए-मिलाद आणि मंगळवार दि. १७ रोजी गणेश विसर्जन आहे. या दोन्ही सणांमध्ये मिरवणुका काढण्याची परंपरा आहे. त्यात गणेश विसर्जन मिरवणुका या देखील वाकडी बारव येथून काढण्याची परंपरा आहे. त्यामुळे या दरम्यान कुठलाही अनुचित प्रकार घडू नये. यासाठी पोलीस प्रशासनाकडून शहरात कडेकोट बंदोबस्त ठेवण्यात आला आहे. यासाठी इतर जिल्ह्यातून देखील विशेष पोलीस बंदोबस्त मागविण्यात आला आहे. तर, काही अनुचित प्रकार घडल्यास पोलिसांकडून मिरवणूक मार्गांवर सीसीटीव्ही बसविण्यात आले आहे.