दोन तोळे सोन्याच्या सौभाग्य लेण्यावर चोरट्यांचा डल्ला !

पोलिसांच्या कार्यक्षमतेवर प्रश्नचिन्ह !

गेल्या काही महिन्यांपूर्वी श्रीराम आणि गरुड रथोत्सवादरम्यान जवळपास २० महिलांच्या गळ्यातील तीन लाखांचे सोने चोरटयांनी लंपास केले होते. इतक्या मोठ्या प्रमाणात चैन स्नॅचिंग होत असताना पोलीस मात्र, सुस्त असल्याचे दिसत आहे. अद्याप पर्यंत एकही चैन स्नेचर किंवा हात चलाखीने गळ्यातील दागिने चोरणारे चोरटे सापडले नसल्याने पोलिसांच्या कार्यक्षमतेविषयी शंका उपस्थित केल्या जात आहे. 

पंचवटी पोलीस ठाण्यातील गुन्हे शोध पथकातील पोलीस हवालदार दीपक नाईक यांच्या पत्नी हेमा दीपक नाईक, ४४ रा. जाई बंगला, जोशी वाडा हनुमान मंदिराजवळ, हिरावाडी या गुरुवार दि. १८ जुलै रोजी संध्याकाळी पावणे सहा वाजेच्या सुमारास योगा करण्यासाठी शक्तीनगर परिसरातून पायी जात असताना दुचाकीवरून आलेल्या अज्ञात चोरटयांनी त्यांच्या गळ्यातील दोन तोळे वजनाचे सोन्याचे मंगळसूत्र खेचून पोबारा केला होता. या घटनेला एक महिना उलटून देखील पोलिसांच्या हाती अद्याप सोनसाखळी चोरांचा कुठलाही सुगावा लागलेला नाही.