खासगी सावकार कुंडलवाल पिता-पुत्राविरोधात गुन्हा दाखल !
खासगी सावकारीचा नाशिकला विळखा !खासगी सावकार रोहित कुंडलवालकडून पिस्टल जप्त !मुख्य संशयित आरोपी खासगी सावकार कैलास कुंडलवाल फरार !सत्ताधारी पक्षाचे वरिष्ठ नेते पुन्हा एकदा अडचणीत ?(खासगी सावकार कैलास कुंडलवाल आणि त्याचा मुलगा रोहित कुंडलवाल)
नाशिक : नाशिकमधील खासगी सावकार देवरे टोळीला मोक्का लावल्यानंतर भद्रकाली पोलिसांनी पुन्हा एकदा एका खासगी सावकाराला जेरबंद केले आहे. बाप-लेकांनी मिळून अनेकांना व्याजाने पैसे देत त्यांच्याकडून वारेमाप पैसे वसूल केल्याचे समोर येत आहे. तसेच, यातील सावकाराने फिर्यादीच्या अल्पवयीन मुलीचा विनयभंग केल्याप्रकरणी देखील पोक्सो अंतर्गत गुन्हा दाखल केला आहे. या घटेनमुळे शहरात खासगी सावकारी किती मोठ्या प्रमाणात फोफावली आहे. हे दिसून येत आहे. विशेष म्हणजे हा सावकार मोठमोठ्या नेत्यांसोबत आपले फोटो काढून सोशल मीडियावर झळकावत त्याचा फायदा दहशत माजविण्यासाठी करत असल्याची माहिती पोलिसांनी दिली आहे. या सावकाराकडून पोलिसांनी आलिशान गाडीसह पिस्टल जप्त केले आहे. या खासगी सावकारांमुळे सत्ताधारी पक्षाचे वरिष्ठ नेते पुन्हा एकदा अडचणीत सापडले आहे. ऐन विधानसभेचे अधिवेशन चालू असल्याने हा मुद्दा विरोधकांकडून उचलला जाण्याची शक्यता आहे.
नुकताच अवैध सावकारी करणाऱ्या वैभव देवरे टोळीवर मोक्का लावण्यात आला आहे. अंबड पोलीस ठाण्यात दाखल गुन्हयातील मुख्य आरोपी व टोळी प्रमुख वैभव यादवराव देवरे, टोळी सदस्य गोविंद पांडुरंग ससाणे, सोनल वैभव देवरे, निखील नामदेव पवार यांनी संघटीतरित्या आर्थिक फायद्याकरीता इंदिरानगर, अंबड, गंगापुर, मुंबईनाका पोलीस ठाण्याच्या परिसरातील लोकांची फसवणूक करून अवैध सावकारी करून लोकांना व्याजाने पैसे देवुन त्यापोटी अवाजवी व्याजाची रक्कम वसुली साठी दमदाटी, जिवे मारण्याची धमकी, प्रयत्न करणे, विनयभंग, जबरी चोरी, खंडणीद्वारे वसुली करुन परिसरात दहशत निर्माण करत होते. नुकतेच या टोळीने जमीन खरेदी व्यवहारात बनावट कागदपत्रे तयार करून एकच जमीन अनेकांना विकत पैसे वसूल केल्याचे निष्पन्न झाले आहे. तसेच, या टोळीविरोधात विविध पोलीस ठाण्यात १५ गुन्हा दाखल असल्याने त्यांच्याविरोधात मोक्कान्वये कारवाई करण्यात आली आहे.
या मोक्क्याच्या कारवाईला काही तास उलटत नाही तोच,, भद्रकाली पोलिसांनी पुन्हा एका खासगी सावकाराला ताब्यात घेतले आहे. याबाबत पोलिसांनी दिलेली माहिती अशी कि, फिर्यादी यांनी आणि त्यांच्या पतीने संशयित खासगी सावकार कैलास बाबुलाल कुंडलवाल, रोहित कैलास कुंडलवाल, रा. उदय कॉलनी, पंचवटी, नाशिक या बापलेकांकडून ३८ लाख रुपये व्याजाने घेतले होते. यातील मुद्दल आणि व्याज फिर्यादी यांनी वेळोवेळी परत केले होते. तरी देखील खासगी सावकार कुंडलवाल या बापलेकांनी अधिकचे पन्नास लाख रुपये देण्याची मागणी केली होती. तसेच, फिर्यादी पती-पत्नीला गंगापूर रोड भक्तिधाम येथे बोलावत अश्लील शिवीगाळ करीत दमदाटी केली होती. तसेच, दुसऱ्या वेळी पैशांची मागणी करण्यासाठी बोलावले असता रोहित कुंडलवाल याने आपल्याकडील पिस्टल काढून फिर्यादी यांना जीवे ठार मारण्याची धमकी दिली होती. तसेच, फिर्यादीची पंधरा वर्षांची मुलगी हिच्यावर हात टाकत पैसे दिले नाहीतर काय होईल माहित आहे ना अशी धमकी दिली. घाबरलेल्या या दांपत्याने भद्रकाली पोलीस ठाण्यात धाव घेत गुन्हा दाखल केला होता.
गुन्हा दाखल होताच भद्रकाली पोलीस ठाण्यातील पोलीस निरीक्षक श्रीनिवास देशमुख यांनी होळीच्या दिवशीच रात्रीच्या सुमारास उदयकॉलनी येथे कुंडलवाल यांच्या घरावर छापा मारत संशयित खासगी सावकार रोहित कुंडलवाल याला ताब्यात घेत अटक केली आहे. तर खासगी सावकार कैलास कुंडलवाल हा फरार झाला असून पोलीस त्याचा शोध घेत आहे. संशयित रोहित कुंडलवाल यांच्याकडून एक पिस्टल, एम. एच. २० एफ. यु. ६८०० हि आलिशान गाडी आणि काही कागदपत्रे पोलिसांनी जप्त केली आहे.
रोहित कुंडलवाल हा भारतीय जनता युवा मोर्चाचा पदाधिकारी असल्याची चर्चा आहे. तसेच, आपले संबंध मुख्यमंत्री देवेंद्र फडणवीस, मंत्री गिरीश महाजन यांच्या सोबत असल्याचे दाखवत त्याने हे फोटो सोशल मीडियावर व्हायरल केले होते. तसेच, नाशिकमधील काही आजी-माजी आमदारांसोबत असलेले फोटो, विविध राजकीय व्यक्तींसह फोटो टाकलेले आहे. हे फोटो सावकारी करताना आणि परिसरात आपली दहशत पसरविण्यासाठी टाकले असल्याची चर्चा नाशिकमध्ये रंगली आहे. या खासगी सावकारांमुळे सत्ताधारी पक्षाचे वरिष्ठ नेते पुन्हा एकदा अडचणीत सापडले आहे. ऐन विधानसभेचे अधिवेशन चालू असल्याने हा मुद्दा विरोधकांकडून उचलला जाण्याची शक्यता आहे.
खासगी सावकार कुंडलवाल बाप-बेट्यांनी अनेकांना अशा पद्धतीने व्याजाचे पैसे दिले असल्याचे पोलिसांचे म्हणणे आहे. व्याजाने पैसे दिलेले पैसे परत मिळाल्यानंतर देखील हि सावकारांची जोडी अवास्तव पैशांची मागणी करून त्यांना धमकी देण्याचे काम करीत असल्याचे देखिल पोलिस तपासात पुढे आले आहे. त्यामुळे कुंडलवाल यांनी ज्याज्या नागरिकांना त्रास दिला आहे. त्यांनी पुढे येऊन गुन्हे दाखल करावे असे आवाहन भद्रकाली पोलिसांनी केले आहे. त्यामुळे भविष्यात देवरे दांपत्यानंतर कुंडलवाल बाप-लेकांवर मोक्कान्वये कारवाई होणार असल्याचे संकेत पोलिसांकडून देण्यात आले आहे.
