दगडफेकीच्या घटनेमुळे जुन्या नाशिक परिसरात तणावपूर्ण शांतता !

               दुधबाजार परिसरात आलेल्या मोटार सायकल रॅली चालकांवर व वाहनांवर हल्ला झाल्याचे बंदोबस्तासाठी तैनात असलेल्या पोलीस अधिकाऱ्यांनी गर्दी पांगविण्यास सुरुवात केली. यावेळी दोन्ही गट आक्रमक झाल्याने पोलिसांनी दोन्ही गट पांगवत परिस्थिती नियंत्रणात आणली. मात्र, या घटनेची माहिती हिंदू संघटनेच्या कार्यकर्त्यांना मिळताच गाडगे महाराज पुतळा परिसरात जमाव जमण्यास सुरुवात झाली. यावेळी पोलीस उपायुक्त (गुन्हे) प्रशांत बच्छाव, पोलीस उपायुक्त किरणकुमार चव्हाण यांच्यासह वरिष्ठ पोलीस निरीक्षकांनी जमावाला समजावत तेथून काढून दिले. मात्र, याचा दरम्यान दुसरीकडे पिंपळ चौक येथे उभ्या असलेल्या दोन चारचाकी वाहनावर काही अज्ञातांनी दगडफेक करत वाहनाच्या काचा फोडल्या. तसेच, याच परिसरात भाजपचे पदाधिकारी बबलू परदेशी यांच्या घरावर हल्ला करत त्यांना व त्यांच्या भावाला गंभीर मारहाण करत जखमी केली. या हल्ल्यात बबलू परदेशी यांच्या डोक्याला मार लागल्याने रक्तबंबाळ झाले होते. तर त्यांच्या घरावर लाठ्या काठ्यांनी आणि दगडाने हल्ला केल्याने बाहेर लावलेले फलक वस्तूंचे नुकसान झाले. पिंपळ चौक येथे आमदार देवयानी फरांदे यांचा लावण्यात आलेले होर्डिंग अज्ञात आंदोलनकर्त्यांनी लाठी काठीच्या सहाय्याने फाडले. यामुळे संपूर्ण परिसरात दगडांचा खच पडल्याचे दिसत होते. 

बडी दर्गा भागातील दगडफेकीत पोलीस उपायुक्त (गुन्हे) प्रशांत बच्छाव यांना उजव्या कानाला दगड लागल्याने जखमी झाले असून एक दगड त्यांच्या बरगडीला लागल्याने त्यांना दुखापत झाली आहे. तर आंदोलकांसह अनेक पोलीस कर्मचाऱ्यांना दगड लागल्याने ते जखमी झाले आहे. 

मोटार सायकल रॅलीला परवानगी नसताना देखील ती निघाली होती. या रॅलीच्या मागे असलेले पोलीस उपायुक्त किरणकुमार चव्हाण आणि वरिष्ठ पोलीस निरीक्षक मधुकर कड यांनी जर त्या रॅलीला वेळीच रोखले असते तर शहराची शांतता भंग झाली नसती. विशेष म्हणजे शहरातील विविध भागातून तरुणांचे जत्थेच्या जत्थे जुन्या नाशिकमध्ये दाखल होत असताना त्यांना रोखण्यासाठी कुठेही पोलीस रस्त्यावर नव्हते का असा प्रश्न देखील यानिमित्ताने उपस्थित केला जात आहे. 

पोलीस आयुक्त याकडेही लक्ष द्या…. : म्हसरूळ टेक भागात घराच्या दरवाजात उभ्या असलेल्या महिलांना भद्रकाली पोलीस ठाण्यातील काही पोलीस कर्मचाऱ्यांकडून अमानुष मारहाण करण्यात आली असल्याचा आरोप महिलांनी केला आहे. यावेळी संतप्त महिलांनी घराबाहेर येऊन पोलिसांच्या वर्तवणुकीबद्दल आपला संताप व्यक्त केला. 

पोलीस आयुक्तालयाकडून जुन्या नाशिक परिसरात अतिरिक्त पोलीस बंदोबस्त तैनात करण्यात आला असून परिस्थिती नियंत्रणात आली आहे. तसेच कोणत्याही अफवांवर नागरिकांनी विश्वास ठेवू नये. : संदीप कर्णिक, पोलीस आयुक्त