स्मार्टसिटी कंपनीचा काँक्रीट उद्योग जोरात सुरु – देवांग जानी

गोदापात्रातील काँक्रीट काढण्याऐवजी मोठ्या प्रमाणात भर !

रामकुंडातील काँक्रीट काढण्यासाठी स्मार्ट सिटीने त्रिसदस्यीय समिती स्थापन केली होती. या समितीने निर्णय घेतला होता की, केंद्रीय संस्था निरी आणि भूगर्भ सर्वेक्षण विभाग (जीएसडीए) यांच्या सल्ल्याने रामकुंडातील कॉंक्रीट काढण्यात यावे. याबाबत गोदाप्रेमी देवांग जानी यांनी स्मार्ट सिटीला दिलेल्या निवेदनात म्हटले होते की, स्मार्ट सिटी कंपनीच्या जानेवारी २०२० च्या इतिवृत्तात नमूद आहे कि, गोदावरी नदी पात्रातील सिमेंट काँक्रीट काढायला निरीची हरकत नाही. तसेच काँक्रीट काढल्याने नदीचा प्रवाह वाढेल. असा अहवाल निरीने स्मार्ट सिटीकडे सादर केला असल्याचे या निवेदनात म्हटले आहे.

भूगर्भ सर्वेक्षण विभागाकडून सुचविण्यात आलेल्या रामकुंड जवळील स्पॉटवर नाशिक स्मार्ट सिटी मार्फत डिसेंबर २०२० मध्ये ट्रायल बोअर घेण्यात आला होता. त्यात दीड इंच पाणी लागले होते. ट्रायल बोअर मधून येणाऱ्या पाण्याची मोजदाद साठी ५ एच.पी. क्षमतेची जलपरी मोटर बसविण्यात आली होती. त्यातून एका मिनिटात ४१ लिटर पाणी बाहेर पडत असल्याचे नमूद करण्यात आले होते. या सर्व बाबी स्मार्ट सिटीच्या रेकॉर्डवर आहे. या दोन्ही संस्थांचा रामकुंडातील तळ काँक्रीट काढण्यासाठी हिरवा सिग्नल असताना, स्मार्ट सिटीकडून विनाकारण विलंब केला जात आहे. स्मार्ट सिटीने या सर्व बाबींचा विचार करता तात्काळ रामकुंडातील तळ काँक्रीट काढण्याच्या कामाला सुरुवात करण्याची मागणी गोदाप्रेमी देवांग जानी यांनी केली आहे.

सध्या नाशिक स्मार्ट सिटी कंपनीचे काँक्रिट उद्योग जोरात सुरु आहे. नाशिक स्मार्ट सिटी कंपनीने मेकॅनिकल गेटच्या बांधकामाच्या नावाखाली अहिल्यादेवी होळकर पुलाखालील नदी पात्रात १ हजार ६७५ cu meter concrete अर्थात २८० रेडी मिक्स काँक्रिटचा गाड्या ओतल्या आहे. त्यासाठी २ कोटी रुपये खर्च केला आहे. नाशिक स्मार्टसिटी कंपनी गांधी तलावातील तळ सिमेंट काँक्रिट काढण्यासाठीची सर्वच तांत्रिक व कायदेशीर प्रक्रिया पूर्ण होऊन सुद्धा गांधी तलावाचे काँक्रिट काढत नाही. मात्र, अजून शेकडो टन काँक्रिट गोदा पात्रात ओतून नदीचे कधीही न भरून येणारे नुकसान करत आहे. हा उच्च न्यायालयाचा अवमान देखील आहे. : देवांग जानी, याचिकाकर्ते गोदाप्रेमी