सराईत गुन्हेगाराने माजवली शहरात दहशत !
दगडफेक, जबरी लूट, महिलेचा विनयभंग करत पिस्टल रोखत दिली ठार मारण्याची धमकी !
नाशिक : शहरात पोलीस प्रशासनाला कायम आव्हान देणाऱ्या सराईत गुन्हेगाराने एकाच दिवशी शहरात दोन ठिकाणी आपल्या टोळीच्या संशयितांसह हाणामाऱ्या करीत महिलेचा विनयभंग केला आहे. तसेच, पोलिसांकडे तक्रार केल्यास पिस्टल दाखवून जीवे मारण्याची धमकी देत जबरी लूट देखील केली आहे. या घटनेने शहरात एकच खळबळ उडाली आहे. विशेष म्हणजे या सराईत गुन्हेगाराने तुरुंगातून सुटल्यानंतर पोलिसांच्या नाकावर टिच्चून शहरात मिरवणूक काढली होती. याबाबत माध्यमांनी पोलीस प्रशासनावर टीकेची झोड उठविल्यानंतर या संशयिताला बेड्या ठोकण्यात आल्या होत्या. सध्या या प्रकरणी मुख्य संशयिताला एका अल्पवयीन संशयितासह ताब्यात घेण्यात आले आहे. आता या सराईत गुन्हेगाराविरोधात पोलीस आयुक्त संदीप कर्णिक कोणती कारवाई करणार याकडे शहराचे लक्ष लागले आहे.
याबाबत पोलिसांनी दिलेली माहिती अशी की, फिर्यादी पंकज चंद्रकांत रकिबे, ३७, रा. पंचवटी हे शनिवार दि. ८ रोजी रात्री साडेनऊ वाजेच्या दरम्यान बळीमंदीर येथे राहणाऱ्या सतनाम राजपूत यांच्या पाळीव श्वानाला जेवण देण्यासाठी गेले होते. यावेळी याठिकाणी संशयित हर्षद सुनील पाटणकर, २५, बेथेलनगर, शरणपूर रोड, सुमित बगाटे आणि त्याचे दहा ते अकरा साथीदार हे सतनाम राजपूत यांच्या घरावर दगडफेक करीत होते. दगडफेकीमुळे घराच्या काचा फुटल्याने याबाबत त्यांना जाब विचारताच त्यांनी सतनाम याने खूप पैसा जमविला आहे. त्याला सलामत राहायचे असेल तर पाच लाख रुपये द्यायला सांग. असे म्हणत पाटणकर याने रकिबे यांच्या गळ्यातील एक तोळ्याची सोन्याची चैन हिसकावून घेतली. तसेच, सुमित बगाटे याने खिशातील तेराशे रुपये बळजबरीने काढून घेत निघून गेले. याबाबत आडगाव पोलीस ठाण्यात दरोडा, जबरी लूट आणि खंडणीचा गुन्हा दाखल करण्यात आला आहे.
आडगाव हद्दीत गुन्हा केल्यानंतर संशयित हर्षद पाटणकर याने रात्री साडेदहा वाजेच्या सुमारास बेथेलनगर, शरणपूररोड येथे येऊन आपले साथीदार संशयित वेदांत चाळगे, राहुल पवार यांच्यासह इतर संशयितांसह परिसरात आरडाओरड करीत रस्त्यावर बियरची बाटली फोडली. यावेळी या परिसरात राहणाऱ्या रहिवाशाने याबाबत विचारणा केली असता याचा राग येऊन संशयित पाटणकर याने त्यांना मारहाण करण्यास सुरुवात केली. यावेळी आपल्या पतीला वाचविण्यासाठी आलेल्या पत्नीला देखील शिवीगाळ करीत धक्काबुकी करीत त्यांचा विनयभंग केला. तसेच, त्यांच्या गळ्यातील सोन्याची चैन काढून घेत कंबरेला लावलेले पिस्तूल काढून पोलिसांकडे तक्रार केल्यास जीवे ठार मारण्याची धमकी दिली. याबाबत सरकारवाडा पोलीस ठाण्यात जबरी लूट, दरोडा, विनयभंग, जीवे ठार मारण्याची धमकी आणि आर्म ऍक्ट प्रमाणे गुन्हा दाखल करण्यात आला आहे.
याबाबत आडगाव आणि सरकारवाडा पोलिसांनी रात्रभर संशयित हर्षद पाटणकर याचा शोध घेतला असता रविवार दि. ९ रोजी रात्री साडेदहा वाजेच्या सुमारास आडगाव पोलिसांना संशयित हर्षद पाटणकर याला बेड्या ठोकण्यात यश आले आहे. तसेच, त्याच्या सोबत एका अल्पवयीन संशयिताला देखील पोलिसांनी ताब्यात घेतले आहे.
संशयित आरोपी हर्षद सुनिल पाटणकर, २५, रा. बेथेलनगर, शरणपुररोड नाशिक याने सरकारवाडा, गंगापुर, पंचवटी, इंदिरानगर, उपनगर आणि नजीकच्या परिसरात दहशत कायम रहावी यासाठी त्याने सर्वसामान्य नागरिकांना धारदार शस्त्रांचा धाक दाखवुन तसेच गैरकायदयाची मंडळी जमवुन मारहाण करुन नागरिकांच्या मनात भिती आणि दहशतीचे वातावरण निर्माण केले होते. त्याच्या गुन्हेगारीला प्रतिबंध करण्यासाठी त्याला २०२२ मध्ये नाशिक शहर व नाशिक ग्रामीण हददीतुन हददपार करण्यात आले होते. मात्र, हर्षद पाटणकर याने हद्दपार कालावधी मध्ये पुन्हा गुन्हेगारी कृत्य चालु ठेवुन जनजिवन विस्कळीत केले होते. पाटणकर याच्यावर प्रतिबंधक कारवाई करुन देखील त्याच्या वागण्यामध्ये कोणत्याही प्रकारे सुधारण होत नसल्याने तत्कालीन पोलीस आयुक्त यांनी त्याच्यावर जुलै २०२३ रोजी एम. पी.डी.ए कायदा अन्वये कारवाई केली होती. संशयित हर्षद सुनिल पाटणकरच्या विरोधात सरकारवाडा, पंचवटी, गंगापुर, इंदिरानगर, उपनगर, आडगाव पोलीस ठाण्यांमध्ये घातक हत्यारांनी जबर दुखापत, चोरी, घरफोडी, शिवीगाळ, जबरी लूट आणि दमदाटी करुन लुटमार, खुनाचा प्रयत्न, मालमत्तेचे नुकसान, मनाई आदेशाचे तसेच हद्दपार आदेशाचे उल्लंघन, विनापरवाना शस्त्र बाळगुन गुन्हे करणे, जबरदस्ती घरात घुसणे, स्फोटक पदार्थाद्वारे नुकसान करणे अशा प्रकारचे गंभीर गुन्हे दाखल आहे.
सराईत गुन्हेगार हर्षद पाटणकर याच्यावर एम. पी.डी.ए कायदा अन्वये कारवाई केल्यानंतर त्याची सुटका जुलै २०२४ रोजी करण्यात आली होती. यावेळी पाटणकर याच्या साथीदारांनी थेट शहरातून त्याची चारचाकी आणि दुचाकीवरून रॅली काढली होती. या रॅलीमध्ये बॉस इज बॅकच्या घोषणा देत अश्लील शिवीगाळ करण्यात आली होती. या रॅलीचा व्हिडीओ सोशल मीडियावर व्हायरल झाल्यानंतर माध्यमांनी देखील पोलीस प्रशासनावर टीकेची झोड उठवली होती. त्यानंतर पोलिसांनी संशयित पाटणकर आणि त्याच्या साथींदाराना पोलिसांनी अटक केली होती. तरी देखील पाटणकर याने आपल्या गुन्हेगारी कारवाया शहरात सुरूच ठेवल्या असल्याचे दिसून येत आहे.
