महाविकास आघाडी धर्माला उमेदवाराकडूनच तिलांजली ?
शिवसेना (उबाठा) पदाधिकारी वसंत गितेंच्या प्रचारामध्ये व्यस्त !शुभेच्छा नाही आबा, तिकड सीमाताईंचे काम कर अन् इकड माझं काम कर !महाविकास आघाडीचे उमेदवार गणेश गीते यांच्यावर व्हायरल व्हिडिओ मुळे स्पष्टीकरणाची वेळ !
नाशिक : नाशिक पूर्व विधानसभा मतदार संघातील महाविकास आघाडीचे उमेदवार गणेश गीते यांची सोशल मीडियावर एक व्हिडिओ क्लिप सध्या चांगलीच व्हायरल होत आहे. या व्हिडीओ क्लिप मधील उजेडात आलेल्या संवादाची चर्चा सर्वच राजकीय पक्षाच्या पटलावर होतांना दिसते. व्हायरल झालेल्या अवघ्या नऊ सेकंदाच्या क्लिपचे स्पष्टीकरण देता देता गणेश गीते यांची चांगलीच फजिती होतांना दिसून येते आहे. प्रसिद्धी माध्यमांसमोर नाशिक पश्चिमचे उमेदवार सुधाकर बडगुजर यांना सोबत घेऊन जाहीर स्पष्टीकरण देण्याची वेळ गीते यांच्यावर ओढवली. यावरून त्या क्लिप मधील संवादाचे मोल लक्षात घेण्याजोगे आहे. संभ्रमावस्थेमुळे पंचवटी परिसरातील उबाठा गटाचे अनेक पदाधिकारी, कार्यकर्ते वसंत गितेंच्या प्रचारात व्यस्त असल्याचे दिसत आहे. यामुळे पूर्व मतदार संघात अनेक चर्चांना उधाण आले आहे.
त्याचे झाले असे, नाशिक पूर्व विधानसभा मतदार संघामधून महाविकास आघाडीने गणेश गीते यांना उमेदवारी जाहीर केली. यादरम्यान त्यांचा वाढदिवस देखील होता, वाढदिवस आणि जाहीर झालेली उमेदवारी यामुळे गीते समर्थकांनी त्यांच्या संपर्क कार्यालयात शुभेच्छा देण्यासाठी गर्दी केली होती. गर्दीमध्ये आबा कापडणे या नावाची एक व्यक्ती होती. त्यांनी गीते यांना शुभेच्छा दिल्या. त्यावेळी गणेश गीते यांनी आबा कापडणे यांना उद्देशून म्हटले की, शुभेच्छा जाऊ दे आपली सगळी टीम गोळा करा…, तिकडे सीमाताईचे काम कर…, अन् इकडं माझं काम कर असे सहजपणे वक्तव्य केले. विषय एवढ्यावर संपणारा अजिबात नव्हता, नेमक्या या संवादाचा कोणीतरी मोबाईल मध्ये व्हिडिओ काढलेला होता. त्यावेळेस व्हिडिओचे कोणालाही एवढं महत्त्व समजले नाही. पण सर्वच पक्षाने उमेदवारी जाहीर केल्यानंतर या व्हिडिओचे महत्त्व अधोरेखित झाले.
प्रचार गणेश गीतेंचा नव्हे तर वसंत गीतेंचा – गणेश गीतेच्या अशा भूमिकेमुळे संभ्रमावस्थेत आणि नाराज झालेल्या कार्यकर्त्यांनी प्रचारापासून अलिप्त राहण्याचे ठरवले असल्याचे काही प्रचार रॅलीतून दिसून येत आहे. अनेक शिवसेना (उबाठा) पदाधिकारी आणि शिवसैनिकांनी गणेश गीते यांना सोडून वसंत गीते यांच्या प्रचारात सामील झाल्याचे बघायला मिळत आहे. पूर्व मतदार संघातील अनेक शिवसैनिक दिवसरात्र मध्य विधानसभेचे उमेदवार वसंत गितेंच्या प्रचारात सहभागी असल्याचे दिसत असल्याने पूर्व विधानसभा मतदार संघात गणेश गीते काहीसे एकाकी पडल्याचे दिसत आहे. यावर वरिष्ठ पदाधिकारी काय तोडगा काढणार याकडे सर्वांचे लक्ष लागले आहे.
महाविकास आघाडीत संभ्रम – नाशिक पश्चिम मतदार संघातील महाविकास आघाडीचे उमेदवार सुधाकर बडगुजर यांचे कार्यकर्ते व्हायरल व्हिडिओ क्लिपमुळे चांगलेच संतापले. गीते इकडे महायुतीचे उमेदवार सीमा हिरे यांचे काम करायला सांगतात, आणि तिकडे स्वतःचे अशी दुटप्पी अन् स्वार्थी भूमिका कशी काय घेऊ शकतात, यामुळे महाविकास आघाडीचे पदाधिकारी व कार्यकर्त्यांमध्ये संभ्रम निर्माण झाला. व्हिडिओ क्लिपमुळे महाविकास आघाडीतच बिघाडी होण्याची शक्यता निर्माण झाली. तसे झालेच तर महाविकास आघाडीचे सर्वच उमेदवार अडचणीत येऊ शकतात. त्याचा लाभ पर्यायाने महायुतीला होईल. असे लक्षात आल्यावर सुधाकर बडगुजर यांच्या उपस्थितीत गणेश गीते यांना मी आबा कापडणे यांची मजाक केली. सीमा हिरे आणि कापडणे क्लासमेट आहेत. म्हणून तसे म्हणालो. हवे तर कापडणे यांचे स्पष्टीकरण घ्या, ते द्यायला तयार आहेत. असे सांगत व्हायरल क्लिपच्या घटनेवर सावरा-सावर करून पडदा टाकण्याचा प्रयत्न केला.
मनातील संभ्रम दूर होईल का – महाविकास आघाडीमध्ये शिवसेना उद्धव बाळासाहेब ठाकरे, शरद पवार राष्ट्रवादी काँग्रेस पक्ष आणि राष्ट्रीय काँग्रेस असे तीन प्रमुख पक्ष आहे. यामध्ये नाशिक पूर्वमधून राष्ट्रवादी काँग्रेस शरद पवार गटाचे गणेश गीते तर पश्चिम मधून उद्धव बाळासाहेब ठाकरे शिवसेनेचे सुधाकर बडगुजर निवडणूक रिंगणात आहे. गीते यांच्या वायरल झालेल्या क्लिप विषयी बडगुजर आणि गीते यांनी स्पष्टीकरण दिले. मात्र, एकमेकांच्या कार्यकर्त्यांच्या मनामध्ये निर्माण झालेली झालेली संभ्रमवस्था नक्की दूर होईल का ? असा प्रश्न यानिमित्ताने उपस्थित होतांना दिसत आहे.
