बदलीच्या सौदेबाजी प्रकरणानंतर उचलबांगडी झालेल्या सुभेदाराची जागा मिळवण्यासाठी खलबत्तं !

सुभेदार पद मर्जीतल्या व्यक्तीला मिळवून देण्यासाठी पोलीस कर्मचाऱ्यांकडून फिल्डिंग !

नाशिकरोड व पंचवटी पोलीस ठाण्यातील काही पोलीस कर्मचाऱ्यांचा यासाठी पुढाकार !

उचलबांगडी झाल्यानंतर देखील सुभेदार हा पोलीस ठाण्यात उघडपणे फिरतो आणि मी पुन्हा येईन असे सांगत फिरत आहे. त्यामुळे हा प्रकार म्हणजे आयपीएस दर्जाच्या अधिकाऱ्याच्या आदेशाला केराची टोपली दाखविल्याचा प्रकार असल्याचे बोलले जात आहे. त्यामुळे अशा मुजोर कर्मचाऱ्यांवर कायमस्वरूपी कडक कारवाई करावी अशी देखील मागणी पोलीस वर्तुळातून केली जात आहे. जाहीर आहे की, मागणी उघड पोलीस अधिकारी किंवा कर्मचारी करून दाखविणार नाही. मात्र, चर्चा सुरु झाल्या आहे याचा मागोवा तरी पोलीस आयुक्तांनी घ्यावा अशी आशा देखील व्यक्त केली जात आहे. 

गेल्या काही वर्षांपासून पोलीस आयुक्तालय आपल्या मर्जीनुसार चालवण्यात सुभेदार अग्रेसर झाले होते. तसेच, कोणत्या पोलीस ठाण्यात कोणत्या अधिकाऱ्याची बदली करायची आणि कोणाला नियंत्रण कक्ष द्यायचे हे देखील हे सुभेदार ठरवत होते. यामुळे वरिष्ठ पोलीस अधिकाऱ्यांमध्ये मोठी खदखद निर्माण झाली होती. हा अतिरेक तत्कालीन पोलीस आयुक्त रवींद्रकुमार सिंगल यांनी हेरला आणि पोलीस प्रशासनातील विविध पोलीस ठाण्यातील २५ सुभेदारांना थेट महाराष्ट्र पोलीस अकादमीमध्ये पाठवले होते. यामुळे मोठ्या प्रमाणात सुभेदाराची मनमानी मोडीत निघाली होती. मात्र, सिंगल यांची बदली होताच पुन्हा या सुभेदारांनी आपले वजन वापरत पुन्हा बदली करून घेत, मलईदार पोलीस ठाणे मिळविण्यात यश मिळविले होते. सध्या पुन्हा या सुभेदारांनी पोलीस प्रशासनाला आपल्या बोटांवर खेळविण्यास सुरुवात केल्याचे दुर्दैवी चित्र दिसू लागले आहे.