हत्येच्या घटनेने पंचवटी हादरली !
प्रेमप्रकरणातून हत्या झाल्याचा पोलिसांना संशय !
नाशिक : पंचवटी पोलीस ठाण्याच्या हद्दीतील मेरी कंपाऊंडमध्ये मध्यरात्री एका निवृत्त पोलीस कर्मचाऱ्याच्या मुलाची हत्या झाल्याची घटना उघडकीस आल्याने एकच खळबळ उडाली आहे. प्रेम प्रकरणातून हि हत्या करण्यात आली असल्याचा प्राथमिक अंदाज पोलिसांनी वर्तविला आहे.
मेरी कंपाऊंड परिसरातील मराठा समाजाच्या वस्तीगृहाबाहेर गगन प्रवीण कोकाटे, २८, वृंदावन नगर, म्हसरूळ, नाशिक या युवकाची मंगळवार दि. २० रोजी मध्यरात्री दोन ते अडीच वाजेच्या सुमारास अज्ञात संशयितांनी डोक्यात तीक्ष्ण हत्याराने वार करून हत्या केल्याची घटना उघडकीस आली आहे. याबाबत बुधवार दि. २१ रोजी सकाळी सात वाजेच्या सुमारास काही नागरिकांना रक्ताच्या थारोळ्यात गगन याचा मृतदेह आढळून आल्याने त्यांनी पंचवटी पोलिसांना घटनेची माहिती दिली.
घटनेची माहिती मिळताच वरिष्ठ पोलीस निरीक्षक मधुकर कड, पोलीस निरीक्षक ज्योती आमने यांच्यासह पोलीस कर्मचाऱ्यांनी घटनास्थळी धाव घेत पंचनामा केला. यावेळी पोलिसांना गगन याच्या खिशातून एक चिट्ठी मिळाली असल्याची माहिती आणि हि हत्या प्रथमदर्शनी प्रेम प्रकरणातून झाली असल्याचा संशय वरिष्ठ पोलीस निरीक्षक मधुकर कड यांनी व्यक्त केला आहे. या हत्येतील मारेकऱ्यांचा शोधार्थ पोलिसांची पथके रवाना करण्यात आली आहे.
नुकतेच पोलीस सेवेतून निवृत्त झालेले आणि मनमिळावू स्वभावाचे सहायक पोलीस उपनिरीक्षक प्रवीण कोकाटे यांचा गगन हा लहान मुलगा होता. गगन याची हत्या झाल्याची घटना समजताच अनेकांनी या परिसरात गर्दी केली होती. तसेच, पोलीस वर्तुळात देखील हळहळ व्यक्त केली जात होती.
