पहिल्याच श्रावणी सोमवारी भोलेभक्तांचा उत्साह शिगेला !

बम बम भोलेच्या गजरात दुमदुमला गोदाघाट !

पहिल्या श्रावणी सोमवारनिमित्त भाविकांची गोदाकाठी मांदियाळी !

कपालेश्वर महादेव मंदिराशिवाय गंगाघाट आणि पंचवटी परिसरात असणाऱ्या निळकंठेश्वर, नारोशंकर, गोरा नंदी मंदिर, स्वयंभू बाणेश्वर, अर्ध नारी नटेश्वर, टाळकुटेश्वर, कैलास मठ, जनार्दन स्वामी मठ आदी मंदिरांमध्ये भाविकांनी दर्शनासाठी गर्दी केल्याचे दिसत होते. तसेच अनेक धार्मिक संस्थांकडून रामकुंड परिसरात शिवभक्तांना फराळाचे वाटप केले जात होते.

श्रावण महिन्यात अनेक सण उत्सव येत असल्याने शेकडो हातांना रोजगार उपलब्ध होतो. शहराच्या आजूबाजूच्या गाव खेड्यांमधून बेल-फुल घेऊन विक्रेते मोठ्या संख्येने आलेले दिसत होते. त्याचप्रमाणे अनेक लहान मुले भाविकांच्या कपाळावर गंध लावून पैसे मिळवून आपला उदरनिर्वाह करण्याचा प्रयत्न करत होते. तसेच, अनेक फळ विक्रेते, दीप विक्रेते आणि खेळणी विक्रेत्यांनी देखील परिसरात गर्दी केली होती. 

श्री कपालेश्वर महादेव मंदिर (ट्रस्ट) तर्फे पहिल्या श्रावणी सोमवार निमित्त भक्तांच्या सोयीसाठी रामकुंड समोरील पायऱ्यांनी भक्तांना प्रवेश दिला जात होता. यामध्ये मारुती मंदिराकडून महिला तर गणपती मंदिराकडून पुरुष अशी स्वतंत्र दर्शन रांग करण्यात आली होती. शौनकाश्रम व गोरेराम मंदिर या बाजूने मंदिरामध्ये येण्यास प्रवेश बंद करण्यात आला होता. यामध्ये मुख्य, उत्तर, दक्षिण प्रवेशद्वार व दर्शन दांडीजवळ अशा ४ ठिकाणी पुरुष आणि महिला सुरक्षा रक्षकांची नेमणूक करण्यात आली होती. तसेच, भक्तांच्या सुरक्षिततेसाठी सीसीटीव्ही कॅमेऱ्याची अद्ययावत यंत्रणा कार्यरत करण्यात आली असून, महत्त्वाच्या सूचना व माहिती देण्यासाठी ध्वनिक्षेपक यंत्रणा कार्यान्वित करण्यात आले आहे.