एका दिवसात सोनसाखळी चोरांनी लुटले ६५ ग्रॅम सोने !

सोनसाखळी चोरांसह सोनारांना सहआरोपी करण्याची मागणी !

नाशिक : दिवाळी सण सुरु होण्याच्या आदल्यादिवशी चोरटयांनी शहरात ठिकठिकाणी चैन स्नॅचिंग करीत महिलांच्या अंगावरील सव्वादोन लाखांचा ऐवज लुटून नेला आहे. विशेष म्हणजे या सर्व सोनसाखळी चोरी भरवस्तीत झाल्याने चोरट्यांना पोलिसांचा कुठलाच धाक उरलेला दिसत नसल्याचे दुर्दैवी चित्र शहरात पुन्हा दिसू लागले आहे. सोनसाखळी चोरांनी पुन्हा आपले डोके वर काढल्याने या चोरट्यांना अटक करून त्यांच्याकडून सोने खरेदी करणाऱ्या सोनारांना देखील सहआरोपी करण्याची मागणी केली जात आहे. या सोनसाखळी चोरीच्या घटनांमुळे सणासुदीच्या काळात महिला वर्गात मोठी दहशत पसरली आहे. 

काही चोरीच्या घटना वगळता अनेकदा सोनसाखळी चोरांना पोलीस अटक करतात. त्यांनी ज्या सोनारांना चोरीचे सोने विकले आहे. त्यांच्याकडून सोन्याची लगड देखील पोलिसांकडून जप्त केली जाते. मात्र, अशा चोरीचे सोने घेणाऱ्यांचा समावेश पोलीस गुन्ह्यात करीत नाही. त्यामुळे सोनार मोकाट असतात आणि पुन्हा चोरीचे सोने विकत घेतात. त्यामुळे सोनसाखळी चोरांकडून ज्या सोनाराने सोने विकत घेतले आहे. अशा सोनारांना देखील सहआरोपी करण्याची नागरिकांकडून मागणी केली जात आहे. 

चोरीचे सोने विकत घेणाऱ्या सोनाराला गुन्ह्यात आरोपी न करण्यासाठी पोलीस अधिकारी आणि कर्मचाऱ्यांकडून मोठ्या प्रमाणात आर्थिक देवाण-घेवाण केली जाते. काही पोलीस ठाण्यातील सुभेदार तर थेट सराफ बाजारातून सोनारांकडून हप्ते देखील गोळा करीत असल्याची चर्चा शहरात रंगली आहे. त्यामुळे पोलीस आयुक्त संदीप कर्णिक यांनी यापुढे सोनसाखळी चोरांकडून चोरीचे सोने घेणाऱ्यांनाही सहआरोपी केल्यास शहरातील सोनसाखळी चोरीवर काहीसा अंकुश येण्यास मदत होईल यात शंका नाही.