अवैध धंद्याच्या हप्त्यासाठी एका युवकाचा खून !

गेल्या वर्षभरापासून शहरात खुनांचे सत्र सुरु आहे. तर टोळीयुद्ध आणि खून का बदला खून म्हणत गुन्हेगार भर रस्त्यात प्राणघातक हल्ले करीत एकमेकांचे मुडदे पाडू लागले आहे. नाशिकच्या इतिहासात अशा प्रकारची गुन्हेगारी नाशिककरांनी कधीच अनुभवलेली नाही. त्यात गुन्हेगारी वाढलेली असताना पोलीस प्रशासनाकडून कोणतीच ठोस पाऊले उचलली जात नसल्याने नाशिककरांच्या संतापात अधिकच भर पडत आहे. तर दुसरीकडे थेट पोलीस कर्मचाऱ्यांचाच गुन्हेगारीत सहभाग उघड होऊ लागल्याने पोलीस प्रशासन गोत्यात येऊ लागले आहे. त्यातच अजून गेल्या महिन्यात जाधव बंधूंच्या हत्येमध्ये पोलीस अधिकारी आणि कर्मचाऱ्यांचा हात असल्याचा आरोप करीत त्यांच्या नातेवाईक आणि मित्रमंडळींनी रस्त्यावर उतरत पोलीस प्रशासनाविरोधात मोर्चा काढला होता. त्यामुळे पोलिसांची इभ्रत चांगलीच वेशीला टांगली गेली होती. 

पोलीस प्रशासनातील अधिकारी आणि कर्मचारी यांचे गैरवर्तन आणि थेट खुनासारख्या गंभीर गुन्ह्यात नावे येऊ लागल्याने त्यांच्याविरोधात कडक कारवाई होईल अशी आशा सर्वसामान्य नाशिककरांना वाटत होती. मात्र, सध्या जाधव बंधू खुनाच्या गुन्ह्यामध्ये म्हणावा तसा तपास होताना दिसत नसल्याचे दिसत आहे. त्यामुळे पोलीस प्रशासनातील खाकीच्या आडून गुन्हे करणाऱ्यांना पाठीशी घातले जात असल्याचा आरोप नाशिककरांकडून केला जात आहे. त्यामुळे पोलीस आयुक्त संदीप कर्णिक यांनी नाशिककरांच्या भावनांचा विचार करून खुनाच्या घटनेमध्ये ज्या अधिकारी आणि कर्मचाऱ्यांची नावे पुढे आली आहे. त्यांची चौकशी करणे गरजेचे आहे. नाहीतर नागरिकांचा पोलिसांवरील असलेला विश्वास देखील उडाल्याशिवाय राहणार नाही.