तडीपार गुन्हेगाराचा अवैध धंद्यावर धुडगूस !

२० हजार हप्ता न दिल्यास गोळ्या घालण्याची धमकी दिल्याची चर्चा !

पोलिसांच्या अस्तित्वावरच नागरिकांकडून प्रश्नचिन्ह उपस्थित !

नाशिक : पंचवटी परिसरातील एका अवैध धंद्यावर तडीपार गुंडाने धुडघूस घालत हप्ताची मागणी केली आहे. तसेच, हप्ता न दिल्यास गोळ्या घालण्याची धमकी दिल्याची माहिती काही प्रत्यक्षदर्शींनी दिली आहे. विशेष म्हणजे असे काही घडणार असल्याची माहिती पंचवटी पोलीस ठाण्यातील अधिकाऱ्यांना आणि गुन्हे शोध पथकाच्या अधिकाऱ्याला देण्यात आल्याची याठिकाणी चर्चा सुरु होती. त्यामुळे गुन्हेगाराने एकप्रकारे पोलिसांनाच खुले आव्हान दिल्याचे दिसत आहे. अवैध धंद्यावर धुडगूस घातला गेल्याने गुन्हा कसा दाखल करावा असा प्रश्न पोलीस अधिकाऱ्यांना पडला आहे. तर दुसरीकडे धिंगाणा बघणाऱ्या नागरिकांना शहरात पोलीस आहे कि नाही असा प्रश्न पडला आहे. अशा पोलिसिंगवर पोलीस आयुक्त संदीप कर्णिक काय कारवाई करणार याकडे सर्वांचे लक्ष लागले आहे. 

हा तडीपार गुन्हेगार अवैध धंद्यावर येऊन धुडगूस घालणार आहे. याची माहिती पंचवटी पोलीस ठाण्यातील गुन्हे शोध पथकातील अधिकारी आणि कर्मचाऱ्यांना देण्यात आली होती. मात्र, यातील कोणीही या गंभीर विषयाकडे गांभीर्याने बघितले नाही. त्यामुळे पोलिसांच्या नाकावर टिच्चून तडीपार गुंडाने शहरात येऊन धिंगाणा घालून गेल्याने या विषयाची परिसरात जोरदार चर्चा सुरु होती. यामुळे पोलिसांच्या अस्तित्वावरच नागरिकांनी पुन्हा एकदा प्रश्नचिन्ह उपस्थित केले आहे. गुन्हा दाखल करावा तर पंचवटी परिसरात खुलेआम अवैध धंदे सुरु असल्यावर शिक्कामोर्तब होणार आणि नाही केल्यास अवैध धंदे चालकांना संरक्षण न देता त्यांच्याकडून हप्ते कसे घ्यावे किंवा ते देतील का असा प्रश्न पोलिसांना पडला आहे. त्यामुळे सध्या पंचवटी पोलिसांनी हाताची घडी तोंडावर बोट ठेवल्याचे दिसत आहे.