किरकोळ वादातून युवकाची हत्या
मध्यरात्री पंचवटी परिसरात रक्तरंजित थरार, आरोपी फरार
प्रतिनिधी । नाशिक
पंचवटीतील आडगाव नाका परिसर शनिवारी पहाटे रक्तरंजित घटनेने हादरला. किरकोळ शाब्दिक वादातून एका सलून चालकाची धारदार चाकूने निर्घृण हत्या करण्यात आल्याने परिसरात भीती आणि संतापाचे वातावरण निर्माण झाले आहे. जुन्या नाशिकमधील रहिवासी जयवंत यशवंत पवार (वय ४५) यांचा या हल्ल्यात मृत्यू झाला असून, हल्लेखोर राजा काकवीपुरे हा घटनेनंतर फरार झाला आहे. पोलिसांनी त्याच्याविरुद्ध खुनाचा गुन्हा दाखल करून शोधमोहीम सुरू केली आहे. या निर्घृण हत्येमुळे जुन्या नाशिक परिसरात हळहळ व्यक्त होत असून पवार कुटुंबावर दुःखाचा डोंगर कोसळला आहे. परिसरातील नागरिकांनी आरोपीला तातडीने अटक करून कठोर कारवाई करण्याची मागणी केली आहे.
पोलिसांनी दिलेल्या माहितीनुसार, जयवंत पवार हे अमरधाम रोड परिसरात राहायला असून, शुक्रवारी रात्री साडेआठच्या सुमारास ते घरातून दुचाकीवर बाहेर पडले होते. त्यांच्यासोबत त्यांचा मित्र विनोद आगळे उर्फ वस्ताद हा होता. हे दोघे रात्री उशिरापर्यंत सोबतच होते. शनिवारी पहाटे साडेतीनच्या सुमारास जयवंत पवार आणि विनोद आगळे हे आडगाव नाका येथील मधुर मिलन स्वीट्ससमोर आले असता, तेथे टायर पंक्चरच्या दुकानाजवळ संशयित राजा काकवीपुरे हा दारू पीत बसलेला होता. यावेळी विनोद आगळे आणि राजा काकवीपुरे यांच्यात किरकोळ कारणावरून शाब्दिक बाचाबाची सुरू झाली. हा वाद वाढत असल्याचे पाहून जयवंत पवार यांनी मध्यस्थी करण्याचा प्रयत्न केला आणि आरोपीला समज देण्याचा प्रयत्न केला.
मात्र, आरोपी संतापाच्या भरात अधिकच आक्रमक झाला. त्याने आपल्या बुटात लपवून ठेवलेला धारदार चाकू बाहेर काढत थेट जयवंत पवार यांच्यावर जीवघेणा हल्ला चढवला. पहिला वार चुकला, मात्र दुसरा वार जयवंत यांच्या उजव्या बगलेखाली छातीवर जबरदस्त बसला. हा वार इतका खोल आणि भीषण होता की जयवंत पवार घटनास्थळीच रक्ताच्या थारोळ्यात कोसळले. अचानक घडलेल्या या थरारक प्रकारामुळे परिसरात एकच खळबळ उडाली.
हल्ल्यानंतर आरोपी राजा काकवीपुरे याने परिसरात दहशत निर्माण करत तेथून पळ काढला. जाताना त्याने एका दुचाकीस्वाराला धमकावत त्याच्या वाहनावर बसून फरार झाल्याची माहिती समोर आली आहे. दरम्यान, घटनास्थळी उपस्थित मित्रांनी तातडीने रुग्णवाहिका बोलावून गंभीर जखमी अवस्थेतील जयवंत पवार यांना खाजगी रुग्णालयात दाखल केले. मात्र, डॉक्टरांनी तपासणीनंतर त्यांना मृत घोषित केले.
घटनेची माहिती मिळताच आडगाव पोलिसांनी तातडीने घटनास्थळी धाव घेत पंचनामा केला. मृत जयवंत पवार यांच्या पत्नी गीता पवार यांनी दिलेल्या फिर्यादीवरून संशयित राजा काकवीपुरे याच्याविरुद्ध खुनाचा गुन्हा दाखल करण्यात आला आहे. फरार आरोपीच्या शोधासाठी पोलिसांची विशेष पथके वरिष्ठ पोलीस निरीक्षक उमेश पाटील यांच्या मार्गदर्शनाखाली रवाना करण्यात आली असून विविध ठिकाणी शोधमोहीम सुरू आहे.
