खुनातील आरोपी अद्याप मोकाटच ! 

पोलिसांचे नेटवर्क झाले कमकुवत !

पोलिसांचे सर्वात मोठे मदतनीस, माहिती पुरविणारे आणि सर्वसामान्य नागरिकांमध्ये वावरणारे नागरिक खबरी असतात. मात्र, गेल्या काही महिन्यांपासून पोलीस दलातील अधिकारी आणि कर्मचारी स्वतःला सिंघम आणि दबंग अधिकारी म्हणून वावरताना दिसत आहे. त्यामुळे त्यांचा सामान्य नागरिकांशी हवा तसा संपर्क राहिला नसल्याने पोलिसांचे खबऱ्यांचे नेटवर्क हे मोठ्या प्रमाणात कमकुवत झाल्याचे आणि ठप्प पडल्याचे दिसत आहे. यासाठी पोलिसांनी पुन्हा एकदा सामान्य नागरिकांशी संपर्क वाढवून त्यांच्याशी संवाद वाढवणे गरजेचे आहे. त्यामुळे परिसरात घडणाऱ्या दैनंदिन किंवा संशयास्पद घटनांची माहिती पोलिसांना मिळू शकेल. 

शहरात खून आणि चैन स्नॅचिंग सारखे गंभीर गुन्हे घडत आहे. मात्र, पोलीस ठाणे आणि गुन्हे शाखेचे अधिकारी दररोज एक दोन दुचाकीसह चोर पकडल्याचे दाखवत आपली पाठ थोपटून घेताना दिसत आहे. मात्र, खऱ्या अर्थाने आव्हानात्मक असलेल्या गंभीर गुन्ह्यातील गुन्हेगार फरार असून त्याकडे लक्ष द्यायला अधिकाऱ्यांना वेळ आहे की नाही असा प्रश्न सर्वसामान्य नाशिककरांना पडला आहे. त्यात दुसरीकडे शहरभर गावगुंडांचे अनधिकृत फलक झळकत असून त्याकडे संपूर्ण पोलीस प्रशासनाचे दुर्लक्ष होत असून गुन्हेगारांचे उदात्तीकरण होत असल्याचे दुर्दैवी चित्र देखील बघायला मिळत आहे.