सुशोभीकरणाला पुरोहित संघाचा विरोध !

नाशिक : गंगा गोदावरी नदीच्या आरतीसाठी चौथरे बांधण्याचे आणि सुशोभीकरणाचे काम सार्वजनिक बांधकाम विभागाकडून सुरु करण्यात आले आहे. मात्र, यापूर्वी देखील कामाला विरोध दर्शवत पुरोहित संघाने काम बंद पाडले आहे. शनिवारी देखील पुन्हा एकदा चौथऱ्याच्या कामास पुरोहित संघ, अहिल्यादेवी ट्रस्ट, हिंदुत्ववादी संघटना, महाविकास आघाडी पक्षातील विविध राजकीय पदाधिकारी व गोदावरी बचाव समिती यांनी गोदाघाटावर होणाऱ्या बांधकामास विरोध म्हणून हातात फलक घेऊन ठिय्या आंदोलन केले. यावेळी काही आंदोलकांनी नदीपात्रात उतरून घोषणाबाजी केली.

          राज्य सरकारच्या माध्यमातून वाराणसी व हरिद्वारच्या धर्तीवर शासकीय रामतीर्थ गोदावरी सेवा समिती गठीत करून त्यांच्यामाध्यमातून गोदावरी महाआरती सुरु करण्यात आली आहे. या समितीला पुरोहित संघाकडून पहिल्यापासून विरोध होत आहे. मात्र या शासकीय महाआरटीला भव्यदिव्य स्वरूप तसेच तिचा प्रचार आणि प्रसार व्हावा याकरिता राज्य सरकारने तब्बल ११ कोटी रुपयांचा निधी उपलब्ध करून दिला आहे. या निधीतून दुतोंड्या मारुती परिसरातील अहिल्याबाई होळकर घाट येथे चौथरे, गोदाघाट परिसरात लाइटिंग व सुशोभीकरण तर शहरातील विविध भागात एलईडी स्क्रीन उभारणी करण्यात येणार आहे. या महाआरती करिता दुतोंड्या मारुती परिसरातील अहिल्याबाई होळकर घाट येथे सार्वजनिक बांधकाम विभागाच्या माध्यमातून चौथऱ्यांसह इतर सुशोभीकरणाचे काम जून महिन्यात सुरु करण्यात आले होते. यावेळी पुरोहित संघाने याला विरोध केला होता. त्यानंतर गेल्या आठवड्याभरापूर्वी याठिकाणी ठेकेदाराकडून पुन्हा काम सुरु केल्यानंतर पुरोहितसंघ आणि काही स्थानिक नागरिकांनी ठिय्या आंदोलन करत काम बंद पाडले होते.