अवलिया करणार सायकलीवर १२ ज्योतिर्लिंग आणि चारधाम यात्रा !

नाशिक : पंचवटी परिसरातील सायकलिस्ट असलेल्या भोलेभक्ताने हिंदू धर्मात अंत्यंत पवित्र आणि मुख्य मानल्या गेलेल्या १२ ज्योतिर्लिंग आणि चारधाम यात्रा सायकलीवरून करण्याचा मानस केला आहे. त्यांची ही यात्रा १६ सप्टेंबरपासून नाशिकमधून सुरु होणार आहे. १३ राज्यांमधून अकरा हजार किलोमीटरची त्यांची ही यात्रा असणार असून ११५ दिवसात ही यात्रा पूर्ण करण्याची तयारी त्यांच्याकडून करण्यात आली आहे. त्याबाबतचे नियोजन आणि थांबण्याचे टप्पे तयार करण्यात आले आहे. २० टप्प्यांमध्ये सलग हि यात्रा सुरु राहणार आहे. हमारा देश, हमारा नाम, एक भारत, श्रेष्ठ भारत आणि राष्ट्रीय एकता अभियान हा संदेश घेऊन ही यात्रा केली जाणार असल्याचे महेश जमदाडे यांनी सांगितले आहे. शनिवारी नाशिकच्या त्रंबकेश्वराचे दर्शन घेऊन त्यांनी आशीर्वाद घेतले आहे.

आडगाव शिवारातील गार्डन काउंटी सोसायटी मध्ये राहणारे महेश जमधाडे यांनी आजपर्यंत अमरनाथ, भीमाशंकर अश्या अनेक यात्रा सायकलवर पूर्ण केल्या आहे. १६ सप्टेंबर ते ३० डिसेंबर २०२४ दरम्यान ११५ दिवसांची १२ ज्योतिर्लिंग व चार धाम यात्रा करण्यास निघणार आहे. ही यात्रा १३ राज्यांमधून साधारणत: ११ हजार किलोमीटरची असणार आहे. रोज साधारण १०० ते १२५ किलोमीटरचा प्रवास केला जाणार आहे. यासाठी त्यांनी सोबत टेन्टचे साहित्य घेतले असून त्यांचा मुक्काम हा सामाजिक मंदिर, पेट्रोल पंप, धर्मशाळा अशा ठिकाणी असणार आहे.

त्यांचा प्रवासाचा पहिला टप्पा हा नाशिक ते हरिद्वार असा १४ दिवसांचा आणि १ हजार ४१५ किलोमीटरचा असणार आहे. दुसरा टप्पा हरिद्वार ते गोरखपूर हा ७ दिवसांचा आणि ७४६ किलोमीटरचा असणार आहे. तिसरा टप्पा गोरखपूर ते काठमांडू (पशुपतीनाथ) ४ दिवसांचा आणि ३७० किलोमीटरचा असणार आहे. चौथा टप्पा काठमांडू ते गोपालगंज ३ दिवसांचा आणि २३९ किलोमीटरचा असणार आहे. पाचवा टप्पा गोपालगंज ते देवघर ४ दिवसांचा आणि ३८२ किलोमीटरचा असणार आहे. सहावा टप्पा देवघर ते पुरी ७ दिवसांचा आणि ६८५ किलोमीटरचा असणार आहे. सातवा टप्पा पुरी ते वाराणसी ९ दिवसांचा आणि ९२१ किलोमीटरचा असणार आहे. पुढे वाराणसी ते उज्जैन हा ९ दिवसांचा ९०२ किलोमीटर, उज्जैन ते ओंकारेश्वर २ दिवस १४१ किलोमीटर, ओंकारेश्वर ते द्वारका ८ दिवस ७८० किलोमीटर, द्वारका ते सोमनाथ २ दिवस २५० किलोमीटर, सोमनाथ ते घृष्णेश्वर ८ दिवस ७४२ किलोमीटर, घृष्णेश्वर ते वैजनाथ ३ दिवस २४८ किलोमीटर, परळी वैजनाथ ते औंढा नागनाथ १ दिवस ११९ किलोमीटर, औंढा नागनाथ ते श्री शैल्यम ६ दिवस ५६२ किलोमीटर, श्री शैल्यम ते रामेश्वरम १० दिवस ९५१ किलोमीटर, रामेश्वरम ते पंढरपूर १२ दिवस १ हजार १७२ किलोमीटर, माळशिरस ते भीमाशंकर ३ दिवस २६१ किलोमीटर, भीमाशंकर ते घारगाव १ दिवस १०० किलोमीटर आणि घारगाव ते नाशिक १ दिवस १०८ किलोमीटर असा २० टप्प्यांमध्ये प्रवास करीत ते नाशिकला पोहचणार आहे.